Dhaloota Gooftaa keenya Qoricha keenya Iyyesuus Kiristoos
Kutaa 2ffaa
Hub :- gara kutaa kanaatti osoo hin darbiin dura kutaa 1ffaa yeroo darbe marsariitii keenya irratti maxxanfame link kana tuquun dubbisaa! erga dubbistanii xumurtan booda hiriyoota keessan Ijoollee Mana Kiristaanaa Ortodoksii Tawaahidoo ta'aan hundaaf karaa Facebook, Telegram fi k.k.f qoodaafii!
Source & Credit :- Dn Getabalew Amare
Iccitii Tawaahidoo (Waloomaa)
Gooftaan keenya Iyyesuus Kiristoos ni dhalate yemmuu jedhamu, Waaqayyo amalummaa abidda qabu Tawaahidoodhaan Giiftii Maariyaamii irraa foon ishee fi dhiiga ishee fudhatee, foon kan hin qabne foon godhatee, dhiiga kan hin qabne dhiigas godhatee akkasumas kan hin argamne kan tures Waaqummaa isaa osoo gadi hin dhiisiin Tawaahidoodhaan nama ta'e jechuu dha.
Kana jechuunis akkeenyummaan Waaqummaa fi namummaa osoo wal hin balleessiin (hin faallessiin) Tawaahidoon tokko ta'aanii argaman jechuu dha.
Gooftaan Iyyasuus kiristoos yemmuu addunyaa kana irra naanna'ee barsiisaa ture Tawaahidoodhaan hojii ajaa'ibsiisaa baay'ee inni hojjete macaafa qulqulluu keessatti katabamee jira.
Fkn :- Tawaahidoon:- Bishaan daadhiitti jijjiire. Yoh.2:-112
• Nama Gooboo qajeelcheera. Luq. 13:10-13
• Naafa adeemsiseera. Mat. 21:14, 9:1
• Du'aa boolla keessaa kaaseera Yoh.11, Marq.
• Qilleensa bishaan irraa abboomeera. Maat. 8:23-27.
• Bishaan gubbaa miillaan ademeera. Maat.14:22-25.
• Balbala cufaa osoo hin baniin ol seneera. Yoh.20:19.
Waaqa ta'ee osoo jiruu foon namaa uffachuudhaan hojii waaqummaa foon osoo lafa hin kaa'iin Tawaahidoon raawwate.
Kunis haadha isaa qulqulleettii Maariyaamiidhaaf ajajamuun suuta suuta guddate. Luq.2:51-52
Tawaahidoodhaan amala foonii mucaan namaa qabu cubbuu irraan kan hafe hunda raawwateera.
Fkn:-
1. Beela'ee, dheebooteera. Maat. 4:1, 21:18
2. Akka namaatti dadhabeera. Yoh. 4:5-6
3. Akkasumas akka namaa rafeera. Maat. 8:24
Kana malees garafamee ni fannifame, ni du'e, ni awwaalame. Maat.27:27-65
Yeroo kun hundumtuu ta'e waaqummaa fi namummaan akka foonii fi lubbuu keenyaa tasa addaan hin bane. Tawaahidoodhaanis du'aa ka'e. Maat. 28:1.
Tawaahidoodhaanis gara samiitti ol ba'e. HDB.1:9
Akkasumas Tawaahidoodhaan deebi'ee dhufuudhaan murtoo isa dhumaa ni laata. Mul.1:7-8
Iyyesuus Kiristoositti Amanuun Akkamittin?
Namootni baay'een ani Iyyesuus Kiristoositti nan amana yemmuu jedhan ni dhaga'aama. Iyyesuus kiristoositti amanuu jechuun maali? Akkamittis? Akka armaan gadiitti ilaalla.
1. Ilma waaqayyoo abbaa ta'uu isaatti amanuu.
Yoh. 5:17-18 Abbaan koo yeroo hundumaa hojjeta, anis yeroo hundumaa nan hojjedha jedhe Hoggantoota warra Yihudotaatti yemmuu dubbatu amanuu didanii waaqayyo abbaa kooti jechuunsaa waaqayyoo wajjin mataa isaa wal of qixxeesse jedhanii ajjeesuudhaaf ka'aan waan itti hin amanneef.
Maat. 17:5 Isatti kan gammadu jaalalleen mucaa koo isa kana isin isaaf dhaga'aa Maat. 3:17.
2. Iyyesuus Kiristoos dhaloota lama qabaachuu isaatti amanuu
Jalqabatti abbaa irraa haadha malee dhalachuu isaa. Fakk. 8:22
Booda immoo abbaa malee giiftii Maariyaamii irraa dhalachuu isaa. Isa. 7:14, Gal. 4:4, Luq.2:1
3. Ilmi waaqayyoo Iyyesuus Kiristoos waaqayyo ta'uu isaa amanuu ykn Iyyesuus Kiristoos Abbaa fi Afuura Qulqulluu wajjin wal qixa ta'uu isaa amanuu
Isa. 9:6 Ilmi nuuf kenname, mucaan nuuf dhalate, innis mootii nagaa waaqa baraa baraati jedhanii amanuu.
Yoh. 5:18 Waaqayyo abbaa kooti jechuun isaa abbaa isaa wajjin wal qixxee ta'uu isaatti amanuu.
Yoh.14:8 Anii fi abbaan tokko, abbaan na keessa anis abbaa keessa.
Foon inni Tawaahidoodhaan uffatee nu fay'ise Dubroo Qulqulleettii Maariyaam irraa foon ishee irraa foon, dhiiga ishee irraa dhiiga, lubbuu ishee irraa lubbuu fudhatee dhufee nu fay'isuu isaatti amanuu.
Waaqayyo abidda hin argamnee fi hin qabamnee fi akkasumas immoo afuura hin argamnee fi hin qabamneedha. Ba'uu 33, Yoh.4:24, Galata Maariyaamii kan gaafa Facaasaa Lakk. 4ffaa
Waaqayyo abiddaa fi afuura ture kun giiftii keenya Maariyaamii irraa dhalachuu isaa shakkii tokko malee akka itti amannuuf Kitaaba Qulqulluu keessatti barreeffamee jira. Isa. 7:14, Luq..2:32, Yoh..6:53, Ibr. 2:16
4. Du'a mo'ee ka'uu isaa shakkii tokko malee amanuu
Maat. 28:5, Luq. 16:6 Du'a mo'ee ka'uun Iyyesuus Kiristoos nuuf abdiin du'aa ka'umsaa akka jiruuf nu gargaara waan ta'eef shakkii tokko malee du'aa ka'umsa isaatti amanuu qabna. Mul.1:5-6
5. Erga Du'ee Ka'ee Guyyaa Afurtama Guutuu Duuka Bu'oota isaatti mul'achuudhaan Isaanii wajjinis taa'ee waa'ee mootummaa Waaqayyoo fi waa'ee abdii isa Waaqa irraa akka inni isaan barsiise Amanuu! HDB.1:3-4
6. Iddoo kabaja isa jalqabaatti Tawaahidoodhaan galataa fi Ililleen ergamootaan marfamee ol ba'uu isaatti amanuu!
Waa'ee isa kanaa ilaalchisee Raajaan Daawwit Faar. 47:5 irratti Waaqayyo ilillee guddaadhaan gara teessoo isaatti ol ba'e jechuudhaan ibsee jira. Qulqulluun Luqaasis immoo HDB .1:9-11 irratti utuu Duuka Bu'oonni isaa ilaalaa jiranii gara samiitti isaa fi ergamoonni Waaqa irraas mul'achuun inni isin osoo ilaaltanii ol fudhatame kun utuu isin ilaaltanii deebi'ee dhufuudhaaf jira kan isaan jedhanitti amanuu dha.
Qulqulluun Diyaaqoon Isxifaanos erga inni du'ee du'a mo'ee ka'ee mirga abbaa isaa akka jiru kan inni argee dubbate sanatti shakkii tokko malee itti amanuu.
7. Ulfinaa fi galata guddaan Ergamoota isaan marfamee deebi'ee murtoo isa dhumaa akka inni kennuuf dhufu shakkii tokko malee Amanuu! Faar. 50:2, HDB. 1:11, Mul. 1:7-8
8. Iyyesuus Kiristoos hundumaa kan uume, hundumaa gochuu Kan danda'u ta'uu isaatti Amanuu. Yoh.1:3
9. Kan nuuf kadhatu osoo hin ta'iin, kan nuuf kadhatamu ta'uu isaatti amanuu!
Dhalachuu isaatii kaasee hanga fannifamuu isaatti cubbuu irraan kan hafe kan mucaan namaa hojjetan hundumaa hojjechuudhaan nu barsiise, nu fayyise erga raawwatee booda dhiiga isaa qulqulluu dhangalaasuudhaan abbaa isaatti nu araarse.
Ergasii booda Maat. 16:25-26 tti anaanis bartaniittu abbaa koos, afuura qulqulluus bartaniittu kana booda abbaan isiniif kadhadhaa isinis immoo abbaa naaf kadhadhu hin jettan jechuudhaan kan inni dubbate kanatti inni Waaqayyoon ta'uu isaatti amanuudhaan abbaan isa keessa innis abbaa keessa jira waan ta'eef. Yoh.10:21. Qulqulluun Phaawuloos waa'ee isa kanaa yemmuu ibsu Waaqayyo karaa ilma isaa erga ofitti nu araarsee booda tajaajila waaqayyoo fi nama walitti araarsu kennaa godhee nu hojjettoota isaatti kennee nutis Waaqayyotti araaramaa jenna. 2 Qor. 5:16-21
10. Gooftaan Iyyesuus Kiristoos foon Giiftii Maariyaamii irraa fuudhee uffachuudhaan maqaan isaa Iyyesuus Kiristoos, Amaanu'eel, Medaani'aalem (Fayyisaa Addunyaa), Ilma Namaa fi k.k.f'n maqaan isaa kun kan fayyinaa ta'uu isaatti Amanuu!
WALUMAA GALATTI GOOFTAAN IYYESUUS KIRISTOOS HOJI BIYYA LAFAA IRRA YEROO TURE HOJJETEEN INNI WAAQAYYOO DHA!
Kitaaba Qulqulluu keessatti akkuma barreeffamee jiru inni hojii hojjeteen waaqayyoo dha.
Waa'ee Waaqummaa Iyyesuus Kiristoos tokko tokkoon ni ilaalla.
1. Hojii hojjetee mul'iseen inni Waaqayyoo dha.
✓ Buddeena ija shanii fi Qurxummii lama eebbisee nama kuma shan(5000) waan quubseef inni waaqayyoo dha. Maat. 14:-14-20.
✓ Iddoo biraattis nama kuma afur(4000) waan nyaachisee quubseef inni waaqayyoo dha. Maat. 15:32-39.
✔ Biyya Qaanaa Galiilaatti mana Dookimaasitti kadhannaan harmee isaa kan giiftii Maariyaamiin bishaan daadhii wayiniitti jijjiiruu isatiin inni waaqayyoo dha. Yoh. 2:1-10
✓ Mucaa ija malee dhalate adda duwwaa irratti hancufa isa lafatti tufee biyyoo dhoqqeessuu dhaan adda isaatti dibee agartuu isaaf uumuu isaatiin inni Waaqayyo dha. Yoh. 9:1
✔ Bishaan irra miilla isaatiin ejjetee waan deemeef inni waaqayyoo dha. Maat. 8:26-27.
✓ Nama du'ee guyyaa afur boolla keessa bule Alaazaariin jecha isaatiin boolla keessaa waamee jiraataa waan taasiseef inni waaqayyoo dha. Yoh.11:35-44.
✔ Maariyaam dubroo irraa bifa ajaa'ibsaa ta'een gadameessa ishee keessatti murtaa'ee nama ta'ee akkaataa inni itti dhalate ajaa'ibsiisaa waan ta'eef inni waaqayyoo dha. Luq.1:26, 2:1.
✓ Fannoo irratti fannifamee osoo jiruu waan ajaa'ibsiisaa torba waan hojjeteef inni waaqayyoo dha. Maat. 27.
✓ Awwaala narraa banaa, kafana narraa hiikaa osoo hin jedhiin aangoo du'aa cabsee du'a mo'atee ka'uu isaatiin inni waaqayyoo dha. Maat. 28:1.
Kanneen kanaa fi kana fakkaatan mucaan namaa raawwatee hojjechuu kan hin dandeenye humna waaqummaa isaatiin waan raawwateef (waan hojjeteef) inni waaqayyoo dha.
2. Samii irraa kan gadi bu'e waan ta'eef inni Waaqayyoo dha
Buddeena samii irraa gadi buusee jireenya namaaf kan laatu isa waan ta'eef inni waaqayyoo dha. Yoh. 6:50-58.
Abbaa isaa biraa jireenya nuuf kennuuf gara biyya lafaa kan dhufe waan ta'eef inni waaqayyoodha. Yoh. 6:33
Bantuun (furtuun) samii fi lafaa isa harka jira waan ta'eef inni Waaqayyoo dha. Maat. 16:19,
Samii fi lafa irra kan jiraatan ulfina maqaa isaatiif waan sagadaniif inni Waaqayyoodha. Filip. 2:10, Isa. 45:23.
Samii irraa kan gadi bu'e mudaa fi cubbuu waan hin qabneef inni Waaqayyoodha. Ibr. 7:26.
Samii irraa gadi bu'ee, deebi'ees iddoo isaa jalqabaatti kan deebi'e isa qofaa waan ta'eef inni Waaqayyoo dha. Yoh. 3:43.
3. Jireenya kan namaaf kennu waan ta'eef inni Waaqayyodha.
✔ Hundumtus isaan waan ta'eef inni waaqayyoo dha. Yoh.1:3
✔ Bishaan jireenyaa namaaf kennu isaa keessaa kan burqu waan ta'eef inni waaqayyoo dha. Yoh. 4:10-14.
✔ Xiixoos nama jedhamu mirga isaatti isa fannifame ture gennata waan sensiseef inni waaqayyoo dha. Luq. 23:43.
✓ Buddeena jireenya namaaf laatu jaalallee isa warra ta'aaniif waan ta'eef inni waaqayyoo dha. Yoh. 6:54.
✓ Karaa dhugaan jireenyi isaa waan ta'eef inni waaqayyoo dha. Yoh. 14:6.
✔ Namoota du'aan baay'ee du'a keessaa kaasee kan jiraachisu waan ta'eef inni waaqayyoo dha. Marq. 5:35, Luq. 7:11, Yoh.11:1.
4. Iddoo hundumaa kan jiru waan ta'eef inni Waaqayyoodha.
➤ Lamas sadiis taanee maqaa isaatiin yoo walitti qabamne nu gidduutti argama waan ta'eef inni Waaqayyoo dha. Maat. 18:20
➤ Hanga dhuma biyya lafaatti nu wajjin jiraata waan ta'eef inni waaqayyoo dha. Maat. 28:20, Erm. 23:23
5. Cubbuu namaa kana namaaf dhiisu waan ta'eef inni Waaqayyoodha.
Bahaan cubbuu keessanii kan isinitti ulfaate fudhaa gara koo kottaa ani immoo isiniifan salphisaa waan jedheef inni Waaqayyoo dha. Maat. 11:28.
Cubbuu addunyaa kanaa kan barbadeessu Hoolaan waaqayyoo isa kana akka jedhe Qulqulluun Yohaannis inni waaqayyoo dha. Yoh. 1:29.
Yaa mucaa koo jabaadhu cubbuun kee siif dhiifama jechuun kan namaaf dhiisu waan ta'eef inni waaqayyoo dha. Maat. 9:2, Luq. 5:20.
Egaa walumaa galatti cubbuu namaa kana namaaf dhiisu waaqayyo gooftaa akka ta'e barreeffamee jira. Faar. 102:1-3, 129:3-4, Ba'uu 34:6-7. Kanaaf Iyyesuus Kiristoos cubbuu namaa kana namaaf dhiisu waan ta'eef inni waaqayyoo dha.
6. Hunduma irratti murteessuu kan danda'u waan ta'eef inni Waaqayyoodha.
➤ Maat. 16:27 irratti ergamoota isaa wajjin ni dhufa. Yeroo sanatti adduma addaan akka hojii isaatti murtoo ni laataaf waan jedhuuf.
➤ Maat. 25:31 Ulfina guddaa dhaan yemmuu deebi'ee dhufu tolotaaf cubbamoota gargar ni fo'a waan ta'eef inni Waaqayyoodha.
➤ Maat. 13:41-42 warra hamaa hojjetan gargar fo'ee akka hojii isaaniitti gara Si'oolitti kan ergu waan ta'eef inni Waaqayyoo dha.
➤ 2 Xim. 4:1 Warra jiraniif du'an irratti kan murteessu waan ta'eef inni waaqayyoo dha.
➤ Mul. 2:23 Nama hundumaaf akka hojii isaatti kan laatu waan ta'eef inni Waaqayyoo dha. Murtoo k.k.f laachuu kan danda'u Waaqayyo qofaa dha.
➤ Uma.18:25 Waaqayyo murteessa biyya lafaa hundumaati waan ta'eef inni Waaqayyoo dha.
➤ Faar. 10:8 Waaqayyo addunyaa hundumaa irratti tolummaadhaan ni murteessa.
➤ Faar. 96:13 Yaa waaqayyo murteessaa biyya lafaa ati ol ol jedhi.
7. Iyyesuus Kiristoos isa jalqaba turee, bara baraan kan jiraatu (Alfaa Oomeegaa) waan ta'eef inni Waaqayyoodha.
Inni Abrihaam fuuldura kan ture inni Waaqayyoodha. Yoh. 8:51.
Barattoota isaanii hanga dhuma biyya lafaatti isin faanan jira jedhe waan ta'eef inni waaqayyoo dha. Maat. 28:19
Inni alfaa oomegaa dha waan ta'eef waaqayyoo dha. Mul. 1:7-8
Isa duraan ture bara baraanis kan jiraatu waan ta'eef inni waaqayyoo dha. Mul.1:17-18, Mul.2:8, 22:13-16 bara baraan kan jiraatu Aalfaa Oomeegaa kan ta'e waaqayyo qofaa dha. Isa. 44:6, Ani isa durati, isa booddeetis.
Isa. 48:12-13 ana fuuldura Waaqni hin turre ana booddees hin jiraatu. Isa. 43:10
8. Kalee fi Ribuu keessa waan jiru qoree kan beeku waan ta'eef inni Waaqayyoodha.
Kitaaba Qulqulluu keesatti waan namni garaa isaa keessatti yaadaa jiru beekuudhaan kan mul'isu ykn kan nama barsiisu waan ta'eef inni waaqayyoo dha.
8.1. Maat. 16:8 irratti Duuka Bu'oonni isaa yaada garaa isaaniitti kan isaan yaadan hubatee isanitti dubbateera.
8.2. Maat.9:3 irratti barsiisonni seeraa yaada garaa isaanii keessatti kan isaan yaadan saaxila baasuudhaan maaliif laphee keessanitti hamaa yaaddu jedhee jira.
8.3. Maat.17:27 irratti garaa qurxummii keessa birriin lama (2) akka jiru Pheexiroositti himee Pheexiroosis akkuma jedhame, qurxummii qabee birrii sana keessaa fuudhee Gibira akka inni kaffalu godheera.
8.4. Luq.6:7-9 irratti barsiisonni seeraa fi Faarisonni isa hadheessuudhaaf isa isaan waan dhoksaatti mari'atan saaxila baasuudhaan isaan qaanesseera.
8.5. Luq.7:39 Farisichi Simi'oon waan hamaa inni laphee isaa keessatti yaade saxila baasee itti himuudhaan isa dheekkameera.
8.6. Yoh. 11:11 Du'a Alaazaar beekuudhaan dursee dubbateera.
Kanneennii fi kan kana fakkaatan dhoksaa hundumaa waan beekuuf Iyyesuus Kiristoos inni waaqayyoo dha.
9. Kan dhoksaa hundumaa saaxila baasee beekuu kan danda'u Waaqayyo isa hundumaa uume qofa akka ta'e Kitaaba Qulqulluu keessatti caafamee Jira.
Faar. 8:9 Fakk. 21:2-17
Erm. 17:9-10 Erm.11:20
Mul. 2:23 Efe. 6:17
Amots 4:13. 1 Tas. 2:4
Ibr. 4:13
10. Iyyesuus Kiristoos fayyisaa fi bilisa baasaa waan ta'eef inni Waaqayyoo dha.
• Maat.1:21 Inni namoota hundumaa cubbuutti waan fayyisuuf maqaan isaa Iyyesuus jedhama.
• Yoh. 12:47 Inni addunyaa kana fay'isuuf malee itti murteessuuf hin dhufu.
• Yoh. 1:29 ilaa Hoolaa Waaqayyoo cubbuu addunyaa kana kan qulqulleessuu dha.
• Yoh. 4:42 Mucaan namaa isa bade fay'isuuf dhufe.
• Luq. 2:14 Har'a fay'isaan magaalaa Daawwititti dhalate
• HDB. 4:12 Fay'inni karaa Kiristoos malee karaa kam illee hin jiru.
1 Xim.1:15, Tiitoo 2:14, Galat. 3:13, Ibr. 2:3
11. kan sagadamuuf kadhannaa namaas kan dhaga'uu waan ta'eef inni Waaqayyoo dha.
Yoh. 9:38, Luq.5:8, Maat.28:9
Maat.14:33, Marq. 5:38, Maat. 2:11
12. Kan Waaqeffamuu fi kan itti amannu waan ta'eef inni Waaqayyoo dha.
Yoh. 14:1, Yoh. 11:25-26, Yoh. 3:15-18, Rom. 9:33.
13. Iyyesuus Kiristoos kan kadhatamuu fi sagadni kan ta'uufii dha.
✓ Maat. 2:11 Ogeessonni ba'a biiftuu Iyyesuus Kiristoos harmee isaa waliin arganii kufanii sagadaniif.
✓ Maat.14:33 Namootni bidiruu keessaa gadi bu'anii kun dhuguma ilma waaqayyooti jedhanii sagadaniif.
✓ Maat. 28:9 Gooftaan keenya Iyyesuus Kiristoos erga du'a mo'ee ka'ee booda bartoonni arganii sagadaniif.
✓ Marq. 5:38 Iyyaariyoos miilla gooftaa jalatti kufee sagaduudhaan mucaan koo du'uudhaaf jetti na fayyisi jedhe.
✓ Luq..5:8 Qulqulluun Pheexiroos miilla gooftaa jalatti kufee sagaaduudhaan «Yaa gooftaa koo ani cubbamaadha narraa addaan hin ba'iin» jedheera.
✓ Yoh. 9:38 Mucaan jaamaa ta'ee dhalate erga fayyee booda «Yaa gooftaa sitti nan amana» jedhee sagadeeraaf.
✓ Filiph. 2:10-11 Waaqaa fi lafa irratti jilbi hundumtuu ulfina maqaa Gooftaa Iyyasuus kiristoosiif akka sagaduuf qulqulluun Phaawuloos barreessee jira. Kanaafuu Iyyasuus kiristoos inni waaqayyoo dha.
14. Kan Waaqeffatamuu fi kan itti amannu waan ta'eef inni Waaqayyoo dha.
✔ Yoh. 3:15-18 Namni Iyyesuus Kiristoositti amanu jireenya baraa baraa ni argata.
✔ Yoh. 11:25-26 Kan natti amanu yoo du'e iyyuu ni jiraata.
✓ Yoh. 14:1 Iyyesuus Kiristoos «Waaqayyootti amanaa, nattis amanaa» jedhe.
✔ Yoh. 14:12 Kan anatti amanu kanan hojjedhu caalaa iyyuu hojjechuu ni danda'a.
✔ Erg. 8:37 Iyyesuus Kiristoos ilma Waaqayyoo isa jiraataa ta'uu isaatti nan amana.
✔ Rom. 9:33 Namni Iyyesuus Kiristoositti amanu hin leyya'u.
Yoh.20:-30-31
✓ Walumaa galatti Iyyesuus Kiristoos Qulqulluu, tolaa, gaarii, sababa cubbuu tokko kan hin qabne waan ta'eef inni Waaqayyoo dha. Waa'een isa kanaas Kitaaba Qulqulluu keessatti bal'inaan barreeffamee jira.
✔ Qulqulluun Gabri'eel Giiftii keenya Maariyaamiitti misiraachoo yemmuu dubbate kan sirraa dhalatu; Qulqulluu ilma Waaqayyoo jiraataati jedhee jira. Luq.1:35.
✔ Yihudaan dhiiga Qulqulluu kana dabarsee du'atti kennuu koof balleesseera jedhe. Maat. 27:4
✓ Mootichi Philaaxoos ani dhiiga nama tolaa kana irraa bilisa jedhe, haati warraa isaas nama tolaa kana dabarsitee du'atti hin laatiin jetteetti. Maat. 27:24.
✔ Gooftaan lyyesuus Kiristoos warra Ayihuudotaan isin keessaa namni cubbuu hojjette jedhee na hadheessuu danda'u eenyuudhaa jedhee gaafatee jira. Yoh. 14:30.
✔ Tiksee gaariin ana. Yoh. 10:11
✔ Daabiloos dirqamuudhaan «Ati Qulqulluu ilma Waaqayyooti» jedhee dhugaa ba'eera. Marq.1:-24, Luq. 4:34.
✔ Isin qulqulluu fi tolaa kan ta'e gantan. HDB. 3:14.
✔ Inni cubbuu irraan kan hafe waan hundumaan akkuma keenya qorameera. Ibr.4:15
✓ Mudaa kan hin qabne cubbuu irraa adda kan ta'e samii irratti ol ol kan jedhe. Ibr. 7:27
✔ Qulqulluu fi dhuga qabeessa kan ta'e inni akkas jedhe. Mul. 3:7.
✔ Inni gonkumaa cubbuu hin qabu. Yoh. 3:5.
✔ Inni cubbuu hin hojjenne, hamaanis afaan isaa keessaa hin baane jedhe Qulqulluun Pheexiroos. 1 Phex. 2:22. Kanaaf Iyyesuus Kiristoos Waaqayyoodha jenneetu itti amanna, dhugaas ni baanaaf. Isaaf yoo dhugaa bane immoo abbaa isaaf ergamoota abbaa isaa duratti dhugaa nuuf ba'a. Maat.10:32-33.
Inni kan hin dogoggorre, kan galateeffamee dha. Maat. 11:6, Maat. 16:16, Yoh. 8:24.
Eenyummaa koo beektanii natti amanuudhaa yoo baattan cuubbuu keessaniin duutu jedhee gooftaan keenya akka dubbate. Yoh. 8:24.
Eenyummaa isaa beeknee akka itti amannuuf arjummaan Waaqayyoo, kadhannaan haadha keenya Qulqulleettii Dubroo Maariyaamii, eegumsi ergamoota Waaqayyoo, Eebbi tolotaa, raajotaa fi qulqulloota Waaqayyoo hunda keenya nu haa gargaaru. Ameen!!!
Galanni Waaqayyoof haa ta'u!
Madda :- Galmee Seenaa
0 Comments